జట్టులో ఉండాలనున్నా.. భయంగా ఉంది

పుణె: భారత జట్టులోకి ఎంపికవ్వాలని ఉన్నా.. కుమార్తెకు దూరంగా ఉండాల్సి వస్తుందేమోనని భయంగా ఉన్నట్లు అగ్రశ్రేణి షూటర్‌ హీనా సిద్ధూ తెలిపింది. కొవిడ్‌-19, కుమార్తె జననంతో దాదాపు మూడేళ్లు ఆటకు దూరంగా ఉన్న హీనా.. జాతీయ క్రీడల కోసం మళ్లీ పిస్టల్‌ పట్టింది. ‘‘జాతీయ క్రీడల్లో పాల్గొనడం మంచి అనుభూతి. కిందటి సారి పంజాబ్‌కు ప్రాతినిధ్యం వహించా. ఈసారి మహారాష్ట్ర తరఫున ఆడనున్నా. ప్రసవం తర్వాత శారీరకంగా చాలా మార్పొచ్చింది. దేహం నా మాట వినట్లేదు. చికాకుగా అనిపిస్తోంది. నెమ్మదిగా మళ్లీ సాధారణ స్థితికి చేరుకునేందుకు ప్రయత్నిస్తున్నా. ఎలాంటి తప్పులు చేస్తున్నానో నాకు తెలుసు. కాని వాటిని సరిదిద్దుకోలేకపోతున్నా. మళ్లీ భారత జట్టులోకి వెళ్లాలనుంది. కాని భయంగానూ ఉంది. జట్టుకు ఎంపికైతే శిక్షణ శిబిరంలో ఉండాలి.. కుమార్తె లేకుండా ప్రయాణాలు చేయాలి. అదే నన్ను భయపెడుతోంది’’ అని హీనా పేర్కొంది.