Cheteshwar Pujara: 73 బంతుల్లోనే పుజారా సెంచరీ.. ఒకే ఓవర్లో 22 పరుగులు!

ఇంటర్నెట్‌ డెస్క్: టీమ్‌ఇండియా టెస్టు స్పెషలిస్ట్‌ ఛెతేశ్వర్‌ పుజారా బ్యాటింగ్‌ శైలి అందరికీ తెలిసిందే. క్రీజులో కుదురుకోవడానికి చాలా సమయం తీసుకుంటూ.. ఒక్కోసారి బౌలర్లను విసిగిస్తుంటాడు. అలాంటి పుజారా తాజాగా జరిగిన ఓ వన్డేలో మెరుపు ఇన్నింగ్‌ ఆడి ఆశ్చర్యానికి గురి చేశాడు. రాయల్‌ లండన్‌ వన్డే కప్‌లో సస్సెక్స్ జట్టు తరఫున ఆడుతూ అదరగొట్టాడు. శుక్రవారం వార్విక్‌షైర్‌ జట్టుతో జరిగిన మ్యాచ్‌లో 79 బంతుల్లో 7 ఫోర్లు, 2 సిక్సర్ల సాయంతో 107 పరుగులు చేశాడు. విశేషమేమిటంటే పుజారా ఒకే ఓవర్లో 22 పరుగులు బాదాడు. ఈ మ్యాచ్‌లో సస్సెక్స్ 311 పరుగుల లక్ష్య ఛేదనలో 112 పరుగులకే రెండు కీలక వికెట్లు కోల్పోయింది. ఈ సమయంలో పుజారా 22వ ఓవర్‌లో బ్యాటింగ్‌కు వచ్చాడు. ఆరంభం నుంచి ధాటిగా ఆడుతూ స్కోరు బోర్డును పరుగులు పెట్టించాడు.

ఇక యామ్ నార్వెల్ వేసిన 45వ ఓవర్‌లో పుజారా చెలరేగిపోయాడు. అప్పటికే 59 బంతుల్లో 66 పరుగులతో క్రీజ్‌లో ఉన్న అతడు.. ఆ ఓవర్లో వరుసగా 4,2,4,2,6,4 బాదాడు. దీంతో 88 పరుగులకు చేరుకొన్నాడు. ఇక ఇన్నింగ్స్ 48వ ఓవర్‌లో తన సెంచరీ సాధించాడు. 49వ ఓవర్లో హన్నాన్-డాల్బీ చేతిలో క్లీన్ బౌల్డ్ కావడంతో అతడి పోరాటం ముగిసింది. ఆ తర్వతా సస్సెక్స్ బ్యాటర్లను బౌలర్లు కట్టడిచేయడంతో నాలుగు పరుగుల తేడాతో వార్విక్‌షైర్‌ విజయం సాధించింది. సస్సెక్స్ రెగ్యులర్ కెప్టెన్ టామ్ హైన్స్ గాయం కారణంగా దూరమవ్వడంతో ఈ మ్యాచ్‌లో పుజారానే కెప్టెన్సీ చేశాడు.