Salaar: ప్రభాస్‌తో నటించడం అద్భుతం: శ్రుతిహాసన్‌

ఇంటర్నెట్‌ డెస్క్‌: ప్రభాస్‌ (Prabhas) చాలా సరదాగా ఉంటారని, ఆయనతో కలిసి నటించడం ఓ అద్భుతమని శ్రుతిహాసన్‌ (Shruti Haasan) అన్నారు. ఈ ఇద్దరు కలిసి నటిస్తున్న పాన్‌ ఇండియా చిత్రం ‘సలార్‌’ (Salaar). ‘కేజీయఫ్‌’ (KGF) ఫేం ప్రశాంత్‌ నీల్‌ (Prashanth Neel) దర్శకత్వం వహిస్తున్నారు. ప్రస్తుతం ఈ సినిమాని హైదరాబాద్‌లో చిత్రీకరిస్తున్నారు. ఈ షెడ్యూల్‌లో పాల్గొన్న శ్రుతిహాసన్‌ ఓ ఆంగ్ల మీడియాకు ఇంటర్వ్యూ ఇచ్చారు. ప్రభాస్‌, సినిమా గురించి మాట్లాడారు. ‘‘నాకు ప్రశాంత్‌ నీల్‌ చిత్రాలంటే చాలా ఇష్టం. తన కథలతో ఆయన ఓ కొత్త ప్రపంచాన్ని సృష్టిస్తుంటారు. అలాంటి ప్రయాణంలో నేను భాగమైనందుకు సంతోషంగా ఉంది. చిత్ర బృందమంతా ఎంతో సహకారం అందిస్తోంది. ప్రభాస్‌తో కలిసి పనిచేయడం అద్భుతం’’ అని శ్రుతిహాసన్‌ తెలిపారు. ఈ చిత్రంలో తాను పోషిస్తున్న ఆద్య పాత్ర గురించి ఇప్పుడే ఏ వివరాలు బయటపెట్టలేనన్నారు.

సూపర్‌ హిట్‌ చిత్రం ‘కేజీయఫ్‌ ఛాప్టర్‌ 2’ తర్వాత ప్రశాంత్‌ నీల్‌ తెరకెక్కిస్తున్న చిత్రం కావడం, ప్రభాస్‌ పవర్‌ఫుల్‌ రోల్‌లో కనిపిస్తారని తెలియడంతో ‘సలార్‌’పై భారీ అంచనాలు నెలకొన్నాయి. జగపతిబాబు కీలక పాత్ర పోషిస్తున్న ఈ చిత్రాన్ని హోంబలే ఫిల్మ్స్‌ సంస్థ నిర్మిస్తోంది. ఈ సినిమాని వచ్చే ఏడాదిలో విడుదల చేసేందుకు దర్శకనిర్మాతలు సన్నాహాలు చేస్తున్నారు. మరోవైపు, ‘ఆదిపురుష్‌’, ‘ప్రాజెక్ట్‌ కె’ (వర్కింగ్‌ టైటిల్‌)తో బిజీగా ఉన్నారు ప్రభాస్‌. ‘అర్జున్‌ రెడ్డి’ ఫేం సందీప్‌రెడ్డి వంగా దర్శకత్వంలో ‘స్పిరిట్‌’, మారుతి దర్శకత్వంలో ఓ చిత్రం చేయనున్నారు. శ్రుతిహాసన్‌.. బాలకృష్ణ సరసన ఓ సినిమాలో నటిస్తోంది. గోపీచంద్‌ మలినేని దర్శకత్వం వహిస్తున్న ఆ చిత్రానికి #NBK107 అనేది వర్కింగ్‌ టైటిల్‌.